🔍尋找威士忌的故事－蘇格蘭篇

威士忌🥃(Whiskey/Whisky)，呢三隻字連唔飲酒嘅人都知道係酒嘅一種，點解會知🤔？因為行街、食飯、上網都有機會見到，但未到「周圍都係～周圍都係」呢一個境界。另一方面，有飲酒或者中意飲威士忌嘅人都未必好清楚威士忌嘅起源、產地、特色等等。所以今日King’s Sir 為各位威士忌新手介紹下其中一個著名嘅威士忌之鄉－蘇格蘭，同時為各位威士忌愛好者溫故知新📚。
蘇格蘭有六大釀造威士忌嘅產區🌟，包括Highland (高地)、Lowland (低地)、Speyside (斯佩塞)、Islay (艾拉島)、Island (島嶼區)，以及Campbeltown (坎貝爾鎮)，每個產區所釀造嘅威士忌都各有特色。
率先介紹嘅產區非Highland 莫屬，Highland 可以話係所有產區當中知名度最高📣，又擁有多座山脈、森林和河谷🏞。好多嘅私釀者被Highland 嘅地理位置吸引而遷入，亦為日後造就多間威士忌名廠而奠定基礎💪🏼。
Highland 出產嘅威士忌大部分酒體適中，風格優雅而多元化。另外，Highland 亦可以分為東南西北四個部分，Highland 嘅東邊盛產大麥🌾，但酒廠較少；Highland 嘅西邊酒廠更係寥寥可數，只有Oban & Ben Nevis，而當中Ben Nevis 生產嘅威士忌有種令人陶醉嘅獨特油脂感🤤；Highland 嘅南邊酒體最淡薄，擁有較多人認識嘅酒廠，例如Glengoyne、Deanston、Loch Lomond 等等；最後Highland 嘅北邊名廠林立，例如有Dalmore、Glenmorangie、Old Pulteney 等等。其中Dalmore 經常係電影銀幕上出現📽🎞，Glenmorangie 不但擁有全蘇格蘭最高嘅蒸餾器，令釀造嘅出黎嘅威士忌酒體細緻，而且Glenmorangie 亦擁有多款風味桶，令其聲名大噪📢。
對比起Highland，Lowland 擁有土地平坦嘅優勢，非常適合種植多種穀物🌾，因此Lowland 做得最出色就係穀物威士忌。Lowland 嘅威士忌風格比較淡麗，酒體口感清爽純淨，主要係釀造調和式威士忌為主，即係作為調酒用嘅基酒。著名✨酒廠包括Auchentoshan、Glenkinchie、Bladnoch 等等。
蘇格蘭威士忌六大產區當中，Speyside 嘅酒廠數量最多🏭，每一間酒廠都大有來頭，例如有威士忌名牌之稱嘅Macallan、蘇格蘭第一間合法蒸餾廠The Glenlivet、雪莉桶嘅代表Glenfarclas、擁有傳奇調酒師嘅Balvenie、以及最早靠威士忌而聞名世界嘅Glenfiddich🏆。Speyside 產區嘅威士忌比其他產區較為濃厚，例如著重花果氣味或者著重雪莉風格等等，普遍味道偏甜，容易入口，King’s Sir 認為Speyside 出產嘅威士忌適合新手✅。
跟住為大家介紹一個出產獨特口味威士忌嘅產區－Islay，飲其他產區嘅威士忌可能會分別唔到來自邊個產區，但Islay出品嘅威士忌係最容易分辨，口味亦非常特別。首先，Islay嘅威士忌通常都帶有三個元素，第一就係鹹香海風味🌊，由於Islay 四面環海，所以陳年嘅威士忌會汲取海風嘅氣味。第二就係泥煤味，因為泥煤正正係烘烤麥芽時候，一定會用到嘅燃料🔥，因此泥煤嘅味道就會好自然咁入左威士忌裏面，而泥煤味經常被人講笑，話味道好似消毒藥水味、醫院味或者係正露丸味。Islay 產區當中比較著名嘅酒廠有Ardbeg、Laphroaig、Lagavulin、Bowmore 等等，而Ardbeg 嘅威士忌擁有最重的泥煤度數（ppm），想挑戰重口味嘅人可以一試💪🏻，而King’s Sir 自己就無興趣😂，另一方面，Bowmore 威士忌嘅雪莉桶泥煤風味係做得最好。雖然Islay 嘅威士忌比較獨特，但都不乏追崇者，當中包括對Islay 威士忌愛不釋手嘅✍🏻日本大文豪－村上春村。
除左Islay 之外，其餘嘅島嶼都會被歸納為 Island 產區，而每個島嶼嘅酒廠都會係威士忌上標明出自邊一個小島🏝，例如Talisker 嘅酒會標明係來自Isle of Skye，Highland Park 嘅酒會標明係來自orkney Islands。另外，每個小島嘅威士忌都有唔同風味，Talisker 會有鮮明泥煤口感，Highland Park 會有石南花香，但每個酒廠嘅酒都會有好相似嘅大海風味🌊。
最後為大家介紹嘅產區係曾經以威士忌聞名世界嘅Campbeltown，在十九世紀被稱為「世界威士忌之都」✨，曾經擁有超過三十間酒廠，但後來遇上經濟大蕭條📉，只係得返三間精英酒廠，分別係Springbank、Glengyle、Glen Scotia。當中Springbank 仍然被世人追崇，仲係好多威士忌愛好者中嘅 no.1。Springbank 嘅威士忌酒體濃厚，經2.5次蒸餾及全程人手製作、地板發芽，係一間十分傳統嘅酒廠。
今個月King’s Sir 就同大家介紹左威士忌之鄉－蘇格蘭嘅六大產區，想知道下個月King’s Sir 品酒教室有咩分享，就記得緊貼住King’s Wine Cellar 嘅FB、IG & 網站啦！
Back to King's Sir 品酒教室